Gustaakh Dil

Baimaan hai ye dil mera mujhe sabse door kar raha hai

kis baat se naaraz hai ye aisa kyun kar raha hai??

chhoti si baat par gussa ho jaata hai, har kisi se umeed lagaata hai

jaane kyon har roz mujhe ye maikhane jaane par mazboor kar raha hai.

Rutba

Yahi wo hawa thi jo kabhi aandhi ban tera ghar tod rahi thi

aaj tu chalta hai to hawa chalti hai, aur tu rukta hai to ye thamti hai

Suroor

Us gambheer chehre mein bhi maine khushi ki ek lehar dekhi hai

Wo Udaas hai magar mayoos nahin hai

Samay ka chakka ghumega to kal uska bhi waqt aayega

Ye zaroori bhi nahin ke jo nahin peeta use ilm-e-suroor nahin hai..

Risk

Meri maano to mat do kisi ko apna dil

har dil ki tarah ye bhi tootega ya todega

Ye toota to tum jee nahin paaoge

aur agar toda to khuda tumhen jeene nahin dega..

Dillagi

Doston ne ki zidd to mikhane ja baitha

Peene ka nahi tha shauk to pilaane ja baitha

Teri aankhon ne magar mujhe bhar-bhar ke jaam diye

aur main madhosh ho tujhse dil lagaane Ja baitha..

Jazbaat (Emotions)

Kya hain ye jazabaat, kahaan se aate hain?

Haste ko rula aur rote ko hasa jaate hain

Kisi ko pal mein apna, aur kisi ko begaana banate hain

Koi laakh koshish kare inhen chhupaane ki

kisi na kisi roop mein baahar aa hi jaate hain..

Bahut nazuk hain ye magar, zara sambhaal ke rakhna

Galti se bhi kisi ke jazbaaton ko mat todna

suna hai bahut hatthi hote hain ye, 

tootne par kai baar zindagi bhar dushmani nibhaate hain

Achha bhi lagta hai agar koi samajhta hai inko

Main bhi koshish karta hoon apni shayaari mein inhen bayaan karne ki

suna hai gar kisi ko achhe lagen to,

unke dil mein ghar kar jaate hain...

Am I Dreaming?

Main unhi purani mulakaton ko yaad kar, 

phir se tumse mil raha hoon

Aisa lagta hai ke jaise abhi shuru hua hoon, 

aur abhi tumhare pyaar mein utar raha hun...

Socha nahin tha kabhi ke phir se mil paaunga tumhse

Aise milunga ye bhi kabhi nahin socha tha

yaadon mein hi sahi,

main namumkin ko to mumkin kar raha hoon

Tumse jo kabhi keh na paaya, wo baaten aaj kar raha hoon

kabhi jo tumhen de na paaya, wo bhi tumhen nazar kar raha hoon

Kabhi ro bhi nahin paaya hun khulkar tumhare saamne

Aaj main apni aankhen namm kar raha hoon

Bhagwaan maana tumhen chheen baitha hai mujhse

magar ye yaaden kaise chheenega

Shayad mujhe khush dekhkar wo phir se jale aur bula le upar

bas yahi sochkar main use thoda tangg kar raha hoon