Kuchh Khaas nahin

Hai kuchh nahin bas kuchh hi dino ki baat hai

main tab kuchh khaas nahin tha aur ab kuch bhi nahin..

Adhoori Kahaani

Shaayad koi puraana kissa unko yaad aaya aur wo ro diye

hum to unki kitaab mein likhe kuchh alfaaz padh rahe the...

ye alfaaz mujhko bhi kuchh ajeeb se lage

likha tha ke 'jab main wahaan pahuncha to wo chal pade the'

Kuchh der mein dekha to unke chehre par muskuraahat thi

kehne lage ke wo koi kahaani likh rahe the...

mujhko bhi yun unhone alvida bolkar darwaaza band kiya

agle hi din wo logon ke kandhon pe svaar khade the...

Wo kitaab aaj bhi main dhoond raha hun,

Jiski adhoori kahaani mein unki saanson ke taar jude the...

Sach

Ya to main sach hoon, ya khuda sach hai..
Jhooth maine kabhi bola hi nahin, sach uska sirf kitaabon mein padha hai...

Hunar

Hunar dikhane ke bhi kai tareeke hote hain 'Rizwaan'
ye zaroori to nahin ke har koi tumhen salaam kare..

Life of Pi (AAM AAdmi) - Just a Thought

Hairat hui tujhko yun rota hua dekhkar
Tu wahi hai jo sabke aansu ponchhta tha
Hairaan hua tujhko yun, mayoos hua dekhkar
Tu to wahi hai, jo sabko honsla deta tha

Hairat hui hai, tujhko yun bezubaan sa dekhkar
tu wahi to hai jise log kehte ke achha bolta hai

Hairaan hua tujhko yun Bepanah sa dekhkar
kya tu wahi hai jo sabke dil mein rehta tha

Aaj hairan hua tujhko yun akela sa dekhkar
Kal tak logon ki bheed se ghira rehta tha

Niraash hua aaj tujhko yun patthar bana dekhkar
kal tak to tu logon ke dilon mein rehta tha....

Ending with a dialogue from a movie, i recently watched-

Aam insaan bhi ek aam ki tarah hota hai, kaata jaata hai,
choosa jaata hai aur khaya bhi jaata hai 

Yaadein

Aaaya taras mujhe apni haalat par bhi aaj,
sab kuchh kiya magar kisi ne nahin jaana...
wo din bhi the jab kuchh nahin karte the,
phir bhi dost har baat mein, hamen yaad kiya karte the..

Pehli Mulaakat

Uske bhi kisse kuchh ajeeb se the

hum bhi jo the apne naseeb se the

mulaakat bhi usne chaha to hui

shayad us waqt hum shareef se the..